पहुरा | ३१ श्रावण २०८०, बुधबार

कैलालीके गौरीगंगा नगरपालिका वडा नम्बर २ आमबगियामे आशा महिला कृषक समुहके २० जनहनहे शुद्धपानीके लाग स्याण्ड फिल्टर वितरण कैगिल बा ।

डिसिएके आर्थिक सहयोगमे दलित महिला अधिकार मञ्चसे संचालित आधार परियोजना अन्र्तगत समुहमे आवद्ध महिला सदस्यहुकनके वायोस्याण्ड फिल्टर वितरण करल हो । दलित महिला अधिकार मञ्चके सदस्य कौशिला नेपालीके अध्यक्षतामे हुइल कार्यक्रममे गौरीगंगा नगरपालिका वडा नम्बर २ के वडा सदस्य कलक चौधरी वडका पहुना रहल रहिट । कार्यक्रममे विशिष्ट पहुना मुक्तकमैया सहकारी संस्थाके अध्यक्ष बोटी चौधरी, भल्मनसा धनिराम चौधरी रहल रहिट ।

कार्यक्रममे वडका पहुना कलक चौधरी बायोस्याण्ड फिल्टर शुद्धपानीके लाग बहुट मजा रहल बटैलै । उहाँ कहलै, ‘सामान्य नल्कासे पानी पिएबेर मनैनहे टमान मेरिक रोग लागे सेकठ मने उहे नल्काके पानी फिल्टर करके पिलेसे रोगसे बाँचे सेक्जाइठ ।’

सक्कु ओर अइसिन फिल्टर वितरण करके संघ ओ प्रदेशसे योजना नाने पर्ना जरुरी रहल ओ वडा कार्यालय समन्वय कैना तयार रहलफे उहाँ जनैलै ।

वडा सदस्य कहली, शुद्धपानीके लाग यी फिल्टरके अनिवार्य हो । फोहर पानीसे टमान रोगके शिकार हुइ परठ । जेकर कारण धनजनके क्षति हुइटी रहल अवस्थामे यी कार्यक्रमसे आर्थिक बचत ओ मानसिक शारिरीक क्षेत्रमे समेत टेवा पुगठ ।

डिसिएके आर्थिक सहयोगमे दलित महिला अधिकार मञ्चसे समुह सदस्यके पारिवारिक अवस्था कम्जोर विपन्न समुदायके सदस्य, मुक्तकमैया बस्ती रहल समुदायमे आवद्ध हुके जिविको पार्जन ओ आर्थिक सुधारके लाग टमान प्रयास करटी रहल मञ्चके सदस्य कौशिला नेपाली बटैली ।

मञ्चसे समुदायमे बेमौसमी तरकारी उत्पादन, बजारीकरण करके पारिवारिक पोषण, आर्थिक शसक्तीकरण, मानविय अधिकार ओ शसक्तीकरण, न्यायमे पहँुचलगायतके गतिविधि संचालन करल उहाँ बटैली ।

पानीके कारण ८० प्रतिशत रोग लग्ना ओरसे छोट प्रयाससे खानेपानीहे शुद्ध ओ सुरक्षित बनाई सेकना ओरसे बायो स्याण्ड फिल्टर वितरण करल उहाँ बटैली । उहाँ आमबगिया लगायत और ठाउँके तीन समुहमे ५० ठो वायोस्याण्ड फिल्टर वितरण करल बटैली ।

ओस्टेक करके कार्यक्रममे मञ्चके कृष्ण बोहरा मानविय शसक्तीकरण, जातिय विभेद, लैङिक विभेद, अधिकारके क्षेत्रमे समेट कार्य करटी रहल बटैलै । सिमान्तकृत समुदायके प्रत्यक्ष लाभ हुइना मेरिक कार्यक्रम तीन तहके सरकारसे नाने पर्नामे उहाँ जोर डेलै ।